Eins undarlega og það hljómar þá voru bein samskipti hefðbundinna almannatengla við einstaklinga yfirleitt mjög lítil hér áður fyrr. Í dag eru þau daglegt brauð, til dæmis í gegnum samfélagsmiðlana.

Nútíma almannatengsl eru alltaf á vaktinni. Áður fyrr komu dagblöð út á ákveðnum tímum og hægt var að fylgjast með fréttatímum ljósvakamiðlanna. Nú koma nýjar fréttir alla daga vikunnar á hvaða tíma sólarhringsins sem er.

Nútíma almannatengsl eru samskipti í rauntíma

Fréttahringurinn hefur styst. Hann var 24 tímar en sennilega nær 60 mínútum í dag. Fólk væntir með öðrum orðum frétta og viðbragða á 60 mínútna fresti í stað sólarhrings eins og áður.

Í raun þarf því að manna fréttavakt fyrirtækisins allan sólarhringinn, alla daga vikunnar, allt árið ef vel á að vera. Fyrirtæki verða að fylgjast með viðhorfi einstaklinga sem getur haft áhrif á orðstír fyrirtækisins.

Á tímum félagsmiðla, bloggs og aðgengilegrar miðlunar hafa almannatengsl aldrei verið mikilvægari því eitt er að miðla og annað að miðla rétt, vel og skilvirkt.