Á vef Félags atvinnurekenda er sagt frá því að tugir fyrirtækja hafa verið í eigu fjármálafyrirtækja í meira en tvö ár þrátt fyrir að núverandi löggjöf kveði á um tólf mánaða eignarhaldstíma. 

Í svari Fjármálaeftirlitsins til Félags atvinnurekenda vegna fyrirspurnar þess um eignarhald fjármálafyrirtækja á fyrirtækjum í óskyldum rekstri kemur fram að eignarhald banka í 68 af 72 fyrirtækjum hefur varað lengur en tólf mánuði. Af 51 fyrirtæki í söluferli eiga bankar 40-100% eignarhlut, eða ráðandi eignarhlut, í 30 þeirra.

Um miðbik september sendi Félag atvinnurekenda fyrirspurn til Fjármálaeftirlitsins vegna eignarhalds fjármálafyrirtækja á fyrirtækjum í óskyldum rekstri. Eins og kunnugt er hafði efnahagshrunið víðtæk áhrif á samkeppnisumhverfi fyrirtækja en nú eru liðin fimm ár án þess að leyst hafi verið úr þeim vanda sem skapaður var með eignarhaldi fjármálafyrirtækja á fyrirtækjum í samkeppni.

Málið á erindi við flest fyrirtæki í samkeppni þar sem eignahald bankanna teygir sig víða og hefur djúpstæð áhrif á rekstur fyrirtækja sem hafa þurft að standa á eigin fótum. Nú er ekki þar með sagt að óeðlilegt sé að fyrirtæki séu tekin til endurskipulagningar en það verður að forðast í lengstu lög að eignahald fjármálastofnunar á fyrirtæki í samkeppni vari lengur en örfáa mánuði. Ekki er hægt annað en að taka undir með Félagi atvinnurekenda að nauðsynlegt sé að breyta lögum til að koma þessum fyrirtækjum aftur í gang og tryggja eðlilega samkeppni á ný.

Félag atvinnurekenda vill breyta 1. mgr. 22. gr. laga um fjármálafyrirtæki nr. 161/2002 á þann veg að tímamörk eignarhalds verði sex mánuðir. Þegar fjármálafyrirtæki sækir svo um aukinn frest samkvæmt ákvæðinu þá þurfi að birta nafn viðkomandi fyrirtækis sem fresturinn tekur til og eignarhluta fjármálafyrirtækisins í fyrirtækinu. 

Félag atvinnurekenda bendir á að fyrirtæki í eigu banka eigi í samkeppni við önnur fyrirtæki á markaði á ójöfnum grunni og skaði þannig markaðinn og hagsmuni neytenda vegna efnahagslegs styrkleika bankans sem bakhjarls. Félagið skorar á stjórnvöld að bregðast við þessum vanda enda sé það löngu tímabært. 

Fróðlegt er að kynna sér tillögur Falda aflsins á vef Félags atvinnurekenda.

 

Deildu:


Viltu meira? Lestu meira

Sendu okkur athugasemd eða fyrirspurn. Ef þú vilt vita meira um efnið eða hefur eitthvað við það að athuga skaltu ekki hika við að hafa samband við okkur. Fylltu út eyðublaðið og sendu okkur línu núna.
Netfangið þitt:
Efni:
Skilaboð:
Hvað er tveir plús tveir (í tölustöfum)?
Allur réttur áskilinn © Cohn & Wolfe Íslandi 2015 | cohnwolfe.com | grey.com | yrgrp.com | wpp.com

Heimilt er að deila og dreifa öllu efni á síðunni sé heimildar getið eða tengill vísi á hana.
Allt efni á síðunnu er á ábyrgð Cohn & Wolfe Íslandi | Meðferð persónuupplýsinga (Privacy Policy) | Kökur (Cookies)